Blogak

Eguraldia lagun, giroa lagun, konpainia lagun eta musika lagun ospatu dugu TOBERAko komunitateak Santa Zezilia 2024an. Seguran jotako kontzertuan eta bere aurreko kalejiran adin askotako lagunen partaidetza izan dugu. Haurrak helduen eredu izan dira, helduak gazteena, irakasleak ikasleena, ikasleak herritarrena... Eskerrik asko guztioi gure ondoan egoteagatik eta elkar hobetzeko -musikalki eta bestela- egiten dugun lanagatik. Kontzertuko aurkezle gazteek bukatu duten moduan, "Gora Santa Zezilia!".

TOBERAko hezkuntza-komunitateak azaroaren 18an ospatuko du musikarion zaindariaren eguna, Seguran kalejira eginda eta Botikaxaharrean kontzertua jota.

Ampo balbulak fabrikatzen eta saltzen dituen kooperatiba da, eta bere egoitza soziala Idiazabalen dago. Zegamako, Segurako, Zeraingo eta Mutiloako TOBERA Musika-eskolak 4 herriotan musikaren arloan egiten duen kultura- eta gizarte-jarduera aintzat hartuta, kooperatibako Kontseilu Sozialak gure ikastegiari diru-laguntza ematea erabaki du aurten ere, 2015ean hasi zenetik. Izan ere, musika-eskola erronka berritan murgildu zalea da eta horiei tinko heltzeko apustua bultzatu nahi izan du horrela kooperatibak.

Proposamen berri(tu) batekin etorri da Mutiloako, Segurako, Zegamako eta Zeraingo TOBERA Musika- eta Dantza-eskola. Iaz euskal dantzen helduentzako taldea osatu zen TOBERAn, dozena bat lagun elkartu zuena. Ikasturte honetan, berriz, formatua eta eskaintza egokitu dituzte, are eta eskuragarriago izan dadin helduentzat proposamena. Hain zuzen ere, hilean 2 orduko saio bana baino ez da izango. 18 urtetik gora izatea beharrezkoa da. Izena ematen dutenen artean erabakiko da saioak noiz emango diren, baina ostiral arratsaldeak eta larunbatak ere aukeran izango dituzte interesatuek.

Ikasturtearen bukaera-aldera honetan, Musika-hizkuntzako 2A mailako ikasleekin instrumentuen ezagutza-saioak egiten aritu ginen maiatzean. Bazkideen Batzar Orokorra ere maiatzean izan genuen, Seguran.

Ikasturte-bukaerako jaialdiak egingo ditu ekainean TOBERAk, baina ez dira ekaineko ekintza bakarrak izango.

Aurtengo jaialdiak ekainaren 18an Zegamako plazan eta 19an Segurakoan izango dira, 18:30ean hasita. Euria eginez gero, Zegamako patio estalian eta Segurako Botikaxaharrean izango dira. Kalejirak, kontzertua, maila gainditu duten ikasleei Diploma-banaketa, afari-merienda eta beste osagai asko izango dituzte emanaldiek. Zegama eta Segura arteko doako autobus-zerbitzua ere izango dute ikasleek egun horietan, ohiko moduan.

Garrantzitsua da musikako ikasleek ongi ezagutzea TOBERAn eskaintzen ditugun musika-tresnak. Ezagutza zenbat eta handiagoa izan, orduan eta gehiago eta hobeto apreziatuko dituzte tresna bakoitzaren ezaugarriak. Ezagutza hori bereziki garrantzitsua da hurrengo ikasturterako musika-instrumentua aukeratzea dagokien ikasleek izatea. Izan ere, maiatzaren 19a baino lehenago, TOBERAn 24/25 ikasturterako izen-ematea egin beharko dute ikasleek, eta zer ikasi hautatu beharko dute hor.

TOBERA Musika-eskolak PERKUSIO AFRO-BRASILDAR tailer irekia antolatu du 16 urtetik gorakoentzat maiatzeko 3 ostiral arratsaldetarako eta ekaineko lehenengo ostiralerako (4 saio, bakoitza 2 ordukoa). Egunen batekin inork eragozpena izanez gero, taldean hala adostuz gero, ekainaren 21era atzeratu ahalko litzateke saio hori. Musika-ezagutzarik ez da behar. Izenemate-epea zabalik 2024ko apirilaren 28ra arte. 75 € dena barne.

[Albiste honi atxikita duzu informazio guztia]

Onintza Arakama ikasle ohiak egin du diseinua. Hain zuzen ere, TOBERA Musika-eskolak bere aurtengo matrikulazio-kanpainarako lelo eta irudi lehiaketa deitu zuen urtarrilean. Jasotako proposamen ugarien artean albiste honekin batera ikus dezakezuen lana izan da hautatua. Onintzak smartphone bat irabazi du. Zorionak! Toberak 24/25 ikasturterako izen-emateko euskarrietan erabiliko du saridunak egindako irudia. Eskerrik asko parte hartu duten guztiei!

Giro paregabean joan zen martxoaren 17an TOBERAk Zegaman ospatutako Dantzari Txiki Eguna. Eguraldi-giroa lagun, ez zen dantzarako girorik falta izan! Eguneko argazki-bilduma HEMEN ikusi eta deskarga dezakezu.