Ate-joka dator musika-ikasturte berria, eta laster ekingo diote 2015/2016 ikasturteari Zegamako, Segurako, Zeraingo eta Mutiloako herritarrek. Eskolaren 29. promozioa izango da. 2014/2015 ikasturteko izenemateek azkeneko urteetako markak hautsi bazituzten, are eta arrakastatsuago dator hurrengo kurtsoa. Herritar ugari dabil erakartzen musikaren kulturara Tobera, eta musikazaletasuna ederki zabaltzen dihardu. Haur eta gazteez gain, helduak ere badabiltza eskolan, eta instrumentuen aukera oso handia da. Taldeko ikasgaiengatik 15,7 euro baino ez da ordaindu behar hilean, eta bakarkakoengatik 30,2 €; taldeetan parte hartzearen truke, berriz, 5 euro bakarrik. 2015/2016 ikasturteari irailaren 9an ekingo zaio ofizialki, asteazkena. Bezperan, irailaren 8an, ordutegiak banatuko dizkiete irakasleek aurrez aurre musika-tresnatako ikasleei. 17:30ean instrumentuan matrikulatutako Zegamako ikasle guztiek Zegamako Aitxuri Herri-eskolara agertu beharko dute, eta 19:00etan Segurako kultura-etxe berrira Segurakoek, Mutiloakoek eta Zeraingoek. Ikasleek irakaslearekin batera adostuko dute, hala, ikasturtean zeharreko bakarkako ordutegia. Irailaren hasieratik, gainera, Zegamako Aitxuriko sarreran eta Segurako kultura-etxe berriko kanpoaldean daude jarrita taldekako irakasgaien ordutegiak (musika-hizkuntzakoak, abesbatzakoak eta dantzakoak). Instrumentu-taldeen asteroko eskola-ordutegiak, berriz, aurrerago zehaztuko dira talde bakoitzeko ikasle-partaideekin. Ordutegiak eta taldekatzeak ezagutu ondoren, inork baja eman nahiko balio egindako matrikulari, bi egun izango ditu aukeran horretarako: irailaren 23a, asteazkena, eta 24a, osteguna. Era berean, epez kanpo bada ere, matrikula egin nahi duenik balego, lehenbailehen jakinarazi beharko luke musika-eskolan edo tobera@tobera.org helbidera idatzita.
- iker -ren bloga
- Logeatu iruzkinak post-eatzeko
