Gertu da musikarion zaindariaren eguna. Azaroaren 22 egun seinalatua izan ohi da TOBERA Musika-eskolan.
Aurten aurreko egunetan ospatuko dugu efemeridea musika-eskolan. Hasteko, asteazkenean, Euskal Herriko Musika-eskolen Elkarteak sustatutako Musikalean ekimenaren barruan kokatuko dugu Seguran emango dugun saioa. Arratsaldeko 18:30ean hasita, Botikaxahar kulturgunean dute jarrita hitzordua hala nahi duten musikazale guztiek. Biharamunean, ostegunean, berriz, Zegamako herri-eskolako gimnasioan emango dute jendaurreko saioa eskolako ikasleek, ordu berean, arratsaldeko 18:30ean.
Kasu bietan, euskal kantagintzaren errepertorioko piezarik ezagunenetakoak hautatu dira egitaraura ekartzeko. Albiste honen azpialdean duzue bi egunetarako prestatutako piezen zerrenda. Blokeka daude pentsatuta bi egitarauak: txistuarekin hasi, gitarrarekin jarraitu, pianoa gero, eta trikitia eta perkusioa amaitzeko. Tartean, baina, badira bestelakoak ere: saxofoia, dantza, e.a.
Euskal kanten errepasoa egiteko baliatzeaz gain, Santa Zeziliaren omenezko kontzertuak ikasleak bakarka jotzen ohitzeko ere erabili nahi izan dira aurten. Horregatik, ikasle bakarrak eta talde oso txikiak izango dira, batez ere, parte hartuko dutenak. Horretaz gain, eskolan hasiberriak diren ikasleei ere lehenengo aukera eman nahi izan zaie. Irailean bertan hasitako ikasle bat baino gehiago jarriko da publikoaren aurrean musika-tresna berria jotzen. Izan ere, garrantzitsua da eskola barruko lana dimentsio publikoarekin uztartzea, hasiera hasieratik. Gainera, ikasturte honetan musika-eskolaren eskaintza zabalari musika-tresna berria batu zaio: zeharkako txirula. Eta, flautarekin, boskote batek, Oh Happy Day joko du Zegamako emanaldian.
- iker -ren bloga
- Logeatu iruzkinak post-eatzeko
