Blogak

TOBERA familiek eratutako kultura-elkartea da. Helburu soziala du, Aizkorpe bailarako herritarrei musika eta dantza irakasteko eta kultura-jarduerak egiteko bokazioa baitu. Horretaz jakitun, AMPO kooperatibak bat egin du beste behin gurekin, eta gure lana diruz laguntzeko erabakia hartu berri du.

Seguran eta Zegaman gure ikasleek eman zituzten jaialdien argazkiak ikusi eta zeure ordenagailura deskargatu nahi badituzu, hemen duzu albuma: https://photos.app.goo.gl/T7Zar2pKCaKBzEVq6

Pare bat bideo ere topatuko dituzu bertan. Bizitakoaren oroigarri izan dakizula! Musikariak eta publikoa dira beharrezko beti. Eskerrik asko gurekin parte hartzeagatik eta musika lau haizeetara zabaltzeagatik!

Bai, bai, bai. Badakigu oraindik ikasturtea bukatzeko puska polita falta dela. Baina gu emozionatuta gaude jada ikasturtearen bukaerako kontzertuekin. Pare bat urte dira ez ditugula jaialdi jendetsu modura egiten, eta irrikitan gaude 2022koarekin.

Duela 2 urteko ikasturte-bukaerako kontzertua birtuala izan zen osorik. Iaz, berriz, aurrez aurreko 2 emanaldi egin genituen eta ikus-entzunezkoetan grabatutako ikasleek jotako hainbat doinu argitaratu genituen ekainean eta uztailean zehar.

Udalerri Euskaldunen Eguna ospatuko da Seguran maiatzaren 14an. Euskararen ezagutza-tasa altua duten ia 100 udal daude elkartuta Udalerri Euskaldunen Mankomunitatean (UEMAn), eta herri horietako batean 2 urtez behin egiten den eguna da Udalerri Euskaldunen Eguna. Azkena 2018an egin zen, Diman (Bizkaia). Aurten Seguran elkartuko dira Euskal Herriko herririk euskaldunenak.

Urteak dira TOBERAk Musikaren Hamabostaldia ospatzen duela Aste Santuaren aurreko asteetan zehar. TOBERAren Musikaren Hamabostaldiko 2020ko programazioa etenda utzi zuen COVIDak. Iaz bideotan grabatuta egin genituen ikasleen entzunaldiak. Eta aurten aurrez aurrekora bueltatuko da gure Musikaren Hamabostaldia. Dena den, momentuko egoerara egokituta egingo ditugu ekintzak oraindik ere.

Atxikian duzue egitaraua.

Martxoak zer gozatua ekarriko digu musikari dagokionez. Gorde datak!

Lagunarteko plana dugu zuretzat. Txalaparta jotzen ikasi nahi baduzu, orain duzu aukera. Albisten honi atxikita doan fitxategian dituzu zehaztapenak.

Txalaparta jotzen ikasteko hastapeneko ikastaroa emango dugu otsailaren 24an, eta martxoaren 3an, 10ean eta 17an.

Sakontzeko ikastaroa, berriz, apirilaren 28an, eta maiatzaren 5ean, 12an eta 19an izango da.

TOBERA Musika-eskolako Zuzendaritza-batzordean ordezkari izango diren kideak hautatzeko aukera izango dute laster ikasleek eta familiek. Hain zuzen ere, urtarrilaren 27an, osteguna, izango dute aukera botoa ematera hurbiltzeko, arratsaldeko 18:00ak eta 20:00 bitarte, Zegamako eta Segurako kultura-etxeetan. Zeraingo familien kasuan, urtarrilaren 27ko arratsaldeko 18:00ak baino lehenago, Zeraingo zuzendaritzakideari entregatuta ere egin ahal izango dute, hala egitea kultura-etxeetara joatea baino erosoagoa balitzaie.

TOBERA Musika-eskolaren eskutik, Zegaman izan ziren aurten beste behin 3 Errege Magoak. 2022an desfile eta guzti sartu ziren herrian Errege Magoak. Iaz, pandemiagatik, geldirik egin zitzaien ongi etorria Erregeei, patio estalian eta aurretiaz txanda hartuta, familia-unitateak elkarren artean nahastu gabe.  Aurten, ordea, Kabalgata ia ohiko eran egiteko modua izan zen.

Seguran, Zegaman, Zerainen eta Mutiloan musikako eta euskal dantzatako eskolak ematen jarraitu ahal izateko, Orkliren diru-laguntza jaso berri du beste urte batez TOBERAk. Orkli berokuntzarako, etxeko ur berorako, ur-beroketarako eta etxetresna elektrikoetarako osagaiak fabrikatzen eta saltzen dituen enpresa da, eta bere egoitza soziala Ordizian dago. Eskerrik asko!