Blogak

Bigarren aldia izan dute ikasturte honetan ikasleek grabazio-estudio profesionalean sartzen. Azaroan Pirritx, Porrotx eta Marimototsen hiru kanta grabatu bazituzten, oraingoan, musika-eskolaren beraren ekimenez, 'Lambada' doinuan oinarritutako moldaketa grabatu dute hainbat ikaslek. Maiatzaren 16a, larunbata, oso osorik eman dute Pottoko Studioan grabatzen.

Ampo balbulak fabrikatzen eta saltzen dituen kooperatiba da, eta bere egoitza soziala Idiazabalen dago. Zegamako, Segurako, Zeraingo eta Mutiloako TOBERA Musika-eskolak herriotan musikaren arloan egiten duen kultura- eta gizarte-jarduera aintzat hartuta, kooperatibako Kontseilu Sozialak gure ikastegiari diru-laguntza ematea erabaki du aurten aurrenekoz. Izan ere, musika-eskola erronka berritan murgilduta dabil azkenaldian (grabazio-estudiotara eramaten ikasleak, eskualdetik kanpora jaialdiak eskaintzen, e.a.), eta horiei tinko heltzeko apustua bultzatu nahi izan du horrela kooperatibak.

Apirilaren 19an, eguraldia lagun, aldarte onean elkartu ziren Zegaman 175 dantzari eta musikari, eta majo girotu zuten guztiek herria. Eskerrik asko Segurako Azpilla Dantza-taldeari, Beasaingo Aurtzaka Dantza-taldeari eta egunean zehar laguntzaile eta bidaide izan genituen kideei.

Urte asko dira TOBERA Musika-eskolak Elkartruke-zikloa hasi zuenetik inguruko musika-eskolak ezagutzeko eta beraiekiko harremana estutzeko. Musika-eskola bana ezagutu izan du urtero denbora-tarte honetan, eta, eskolaren 25. urteurrenean, aparteko izaeraz, Goierriko musika-eskolen arteko lehenengo topaketa egin zuen gainera.

Seguran martxoaren 22an jaialdia egingo da Korrika datorrela girotzeko, eta hantxe izango dira TOBERA Musika-eskolako ikasleak, musika jarriz, ekarpena egiten (18:30, plazan jarritako karpan). Egun horretarako prestatutako kanten artean, aurtengo Korrikaren kanta ofizialaren moldaketa dago, txistuko eta gitarrako ikasleen eskutik. Ikus egitarua osorik beheko estekan.

Parekidetasuna lortze-bidean ekarpena egingo dute Segurako herritarrek igandean, martxoaren 8an bertan, Segurako Udalak deituta. Aldarrikatze-ekintza izango da oraingoan. Elkarretaratzea egingo dute eguerdian, plazan, emakumea gutxiesten duten praktikak alboratzeko bisibilizazio-ekimen modura. Eta, osagaien artean, hantxe izango dira TOBERA Musika-eskolako ikasleak ere, musikaz mezu bera helarazten. Eta, gainera, adibide praktikoa plazaratuta: emakumezko ikasleen lana da, batez ere, erakutsiko duena musika-eskolak. Ikus egitaraua behealdean.

Francisco Escudero MKPko ate irekien astea:

Martxoaren 23tik 27ra Donostiako Kontserbatorioan egingo den ate irekien jardunaldien informazioa duzue atxikian. Ikasleentzat interesgarria izan liteke asteazkenean, 25, 18,00etan emango duten Musika-irakaskuntza profesionalei buruzko informazio-hitzaldia. Ezer argitu nahi duenak, eskura du TOBERA bera nahiz  Francisco Escudero Kontserbatorioa: jefedeestudios@conservatorioescudero.org

28. ikasturtea du aurtengoa Tobera Musika-eskolak. Funtzionamendu-araudia berritzeaz gain, Batzar Orokorrak aurreko kurtsoaren balorazioa eta aurtengoaren kudeaketa-plangintza aho batez onartu ditu.