Blogak

TOBERA Musika-eskolako Zuzendaritza-batzordea berritzeko garaia iritsi da, urtero egiten dugun moduan. Aipatu Zuzendaritza-batzordea, besteak beste, matrikulatutako ikasleen 9 gurasok edo tutorek, edo adin-nagusiko ikaslek berek osatzen dute, eta hauetatik 5 Zegamakoak dira eta beste 4 Segurakoak, Zeraingoak eta Mutiloakoak. Zegamako 5 guraso hauetatik 2 dira aurten berritu beharrekoak eta beste horrenbeste Seguran eskolak hartzen dituzten ikasleen gurasoen artetik.

Botoa emateko aukera 2015eko abenduaren 16an (asteazkena) 18.00etatik 20.00etara egongo da, Zegamako eta Segurako Kultura-etxeetan.

Era berean, Zuzendaritza-kide izateko boluntariorik balego, horiek izango lukete sartzeko lehentasuna. Arren, batzordean parte hartzeko nahia baduzu, jarri harremanetan egungo Zuzendaritza-kideetako edonorekin, deitu 943 801570 telefono-zenbakira, edo bidali mezu elektronikoa tobera@tobera.org helbidera.

Abenduaren 3a Euskararen Nazioarteko Eguna bada ere, TOBERA Musika-eskolan egunero egiten dugu ahalegina euskaraz bizitzeko eta euskaraz bizitzeko aukerak eskaintzeko. Euskaraz (ia osorik) da gure egunerokotasuna eskolan, euskaraz dira bilerak, euskaraz hartzen ditugu aktak, euskaraz ematen eta hartzen ditugu eskolak, euskaraz zuzentzen gatzaizkie instituzioei eta eragileei, euskaraz hitz egiten dugu... Ia gehienetan...

Azaroaren 25eko Segurako elkarretaratzean partaide izango da TOBERA Musika-eskola, emakumeenganako indarkeriaren kontra duen jarrera berresteko.

Indarkeria oro gaitzesten dugu, eta musikak batzen jarrai gaitzan tinko lan egiten jarraituko dugu.

Azaroaren 19an, astean zehar Mutiloan egindako Kultura-astearen barruan, protagonismoa hartu zuen musikarion zaindari Santa Zeziliak. TOBERA Musika-eskolako ikasleen bitartez izan zen; kalejira egin zuten Mutiloan trikitiko, panderoko eta txistuko zenbait ikaslek. TOBERA Musika-eskolak Mutiloan egindako lehenengo ekintza ofiziala izan zen.

Musikarion zaindari Santa Zeziliaren omenezko ekitaldiak bi izango dira aurten TOBERA Musika-eskolan. Batetik, hilaren 18an, asteazkena, Segurako Aldundiaren Aterpetxean jaialdia eskainiko dute 75 ikaslek arratsaldeko 18:30ean. 23 abestirekin prestatutako egitaraua ezagutzeko, albiste honen behealdean duzu aukera. Euskal Herriko Musika-eskolen Elkartean antolatutako 'Musikalean' ekintzaren barruko saioa izango da. Orain arte kontzertu bana eman izan badu ere musika-eskolak Zegaman eta Seguran, aurtengo jaialdia bateratua izango da eta iraupen luzeagokoa.

Txistua ez zen bakarrik geratu aurreko urriaren 24an Beasainen egindako Txistu-alardean. Txistuarekin batera, beste musika-tresna batzuk, abeslariak eta dantza izan ziren laguntzaile. Joseba Ibargurenen zuzendaritzapean egin zen kontzertua, baina, aurretik, 19:00etatik, kalejira egin zuten partaideek kontzertu-lekuraino. Tartean izan ziren TOBERA Musika-eskolako 5 txistu-ikasle ere. Ikuskizun handiaz gozatu bakarrik ez, parte-hartzaile aktibo eta eguneko protagonista ere izan ziren, beraz.

Emakumeen Mundu-martxa mugimendua ekimenak biltzen dabil azkenaldian gure inguruan, eta horietako bat Seguran irailaren 12an egindakoa izan da. Bertan, aspaldiko lixibaleku batean egin da ekitaldi xumea, eta mugimenduari atxikimendua eman dion herriko elkarte bakoitzak landare bana landatu du bere babesaren adierazgarri. Babesleen artean egon da Tobera Musika-eskola ere, eta lehendakaria bera izan da eskolaren izenean landarea jartzeaz arduratu dena.

Ate-joka dator musika-ikasturte berria, eta laster ekingo diote 2015/2016 ikasturteari Zegamako, Segurako, Zeraingo eta Mutiloako herritarrek. Eskolaren 29. promozioa izango da. 2014/2015 ikasturteko izenemateek azkeneko urteetako markak hautsi bazituzten, are eta arrakastatsuago dator hurrengo kurtsoa. Herritar ugari dabil erakartzen musikaren kulturara Tobera, eta musikazaletasuna ederki zabaltzen dihardu. Haur eta gazteez gain, helduak ere badabiltza eskolan, eta instrumentuen aukera oso handia da.