ekintzak

Prest ditu TOBERA Musika-eskolak ikasturte-amaierako jaialdiak. Zegaman ekainaren 16an izango da, asteartea, eta Seguran 18an. Bi kasuetan herriko plazan izango da ikasleen emanaldia.

Bigarren aldia izan dute ikasturte honetan ikasleek grabazio-estudio profesionalean sartzen. Azaroan Pirritx, Porrotx eta Marimototsen hiru kanta grabatu bazituzten, oraingoan, musika-eskolaren beraren ekimenez, 'Lambada' doinuan oinarritutako moldaketa grabatu dute hainbat ikaslek. Maiatzaren 16a, larunbata, oso osorik eman dute Pottoko Studioan grabatzen.

Urte asko dira TOBERA Musika-eskolak Elkartruke-zikloa hasi zuenetik inguruko musika-eskolak ezagutzeko eta beraiekiko harremana estutzeko. Musika-eskola bana ezagutu izan du urtero denbora-tarte honetan, eta, eskolaren 25. urteurrenean, aparteko izaeraz, Goierriko musika-eskolen arteko lehenengo topaketa egin zuen gainera.

Seguran martxoaren 22an jaialdia egingo da Korrika datorrela girotzeko, eta hantxe izango dira TOBERA Musika-eskolako ikasleak, musika jarriz, ekarpena egiten (18:30, plazan jarritako karpan). Egun horretarako prestatutako kanten artean, aurtengo Korrikaren kanta ofizialaren moldaketa dago, txistuko eta gitarrako ikasleen eskutik. Ikus egitarua osorik beheko estekan.

Parekidetasuna lortze-bidean ekarpena egingo dute Segurako herritarrek igandean, martxoaren 8an bertan, Segurako Udalak deituta. Aldarrikatze-ekintza izango da oraingoan. Elkarretaratzea egingo dute eguerdian, plazan, emakumea gutxiesten duten praktikak alboratzeko bisibilizazio-ekimen modura. Eta, osagaien artean, hantxe izango dira TOBERA Musika-eskolako ikasleak ere, musikaz mezu bera helarazten. Eta, gainera, adibide praktikoa plazaratuta: emakumezko ikasleen lana da, batez ere, erakutsiko duena musika-eskolak. Ikus egitaraua behealdean.

Xabi Arakama musikari polifazetikoa da. Musika-tresna tradizionalei fidel beti (trikitia, panderoa, txalaparta...), baina musika-estilo ugari jorratzen aldi berean (ska, berbena-musika, jazza...). Aste Santuan bigarrengoz itzuliko da Madrilgo Café Centralera, astebetez, gauero, Joshua Edelmanen taldearekin jotzera. Bere ibilbide luzean, urrats bat gehiago. Gogotik ari omen da ikasten gainera. Gero, TOBERAko ikasleei erakusteko.

Martxoa bete-bete etorriko zaigu TOBERA Musika-eskolara. Herri-izaerako saioak, instrumentu ugariren entzunaldiak, ate irekiko jardunaldiak, kontzertuak eta dantza-ikastaroa daude ekintzen artean. Atxikian duzuen eranskinean ikusiko duzue egitarau osoa. Duela bi ikasturte Musikaren Astea antolatu eta gero, iaz Musikaren Hilabetea egin zuen musika-eskolak. Aurten, aldiz, askotariko ekintzak martxoaren 8aren eta 26aren artean kontzentratu nahi izan ditu, ia egunero, herritarrek eta ikasleek TOBERAn eskuragarri duten eskaintza zabalaren inguruko zuzeneko informazioa jaso ahal izan dezaten.